First Line: Birhen Inang mapag-ampon Title: Gozos ki Nuestra Señora de Salvacion de Joroan Composer/s: Traditional Liturgical Use: Recessional Printable lyrics: PDF (Available Soon) Audio files: MIDI (Available Soon) |
Lyrics
Birhen Inang mapag-ampon
Mga aki mo agawon
Napaalaw na sumirong
Magdalita mong lilingyon
Ilaw mo an linalaom
Sa sakit simong surogon
AN DEVOTOS MO SUROGON SA MGA SAKIT AGAWON
Ilaw ka sa kalangitan
Nin Angheles kabanal-banalan
Sa mabagsikon mong ngaran
An infierno tinatakigan
Minasarig an kinaban
Sa pagsurog mo, pagtabang
AN DEVOTOS MO SUROGON SA MGA SAKIT AGAWON
Ilaw kang panô nin grasya
Burabod na pararanga
Apostoles, Patriarca
Gabos simo naginhawa
Ngaran mo apdon mi sana
Pagtabang mo nakikita
AN DEVOTOS MO SUROGON SA MGA SAKIT AGAWON
Ilaw kang pano nin bagsik
Kan ejercitos sa langit
An infierno, an infieles
Sinda gabos nananakig
Masabi an simong bagsik
Orog na sa nananarig
AN DEVOTOS MO SUROGON SA MGA SAKIT AGAWON
Ilaw kang nakakaagaw
Sa gabos na pag-alaman
An tawong nangagsasakay
Kun yaon sa kahandalan
Umapod simong pagtabang
Daing liwag maaagaw
AN DEVOTOS MO SUROGON SA MGA SAKIT AGAWON
Ilaw ka nin mga Castillo
An pagsurog, pagtabang mo
An nakakusog na gayo
Orog sa mga devoto
An umapod kan ngaran mo
Dai nanggad maaano
AN DEVOTOS MO SUROGON SA MGA SAKIT AGAWON
Ilaw kang nakakaagaw
Sa gabos na pag-alaman
Orog pa sa kabuyohan
Masabi an simong ngaran
Makakaligtas giraray
Minsan an napapandongan
AN DEVOTOS MO SUROGON SA MGA SAKIT AGAWON
Ilaw ka sa puso nin tawo
Na namomoot saimo
Harigi kang gapong gayo
Na minsan suhay saimo
Magbabalik na totoo
Kun pasurog kan ngaran mo
AN DEVOTOS MO SUROGON SA MGA SAKIT AGAWON
Ilawi kan simong bangraw
Kaming mga makasalan
Kan simong manto sangkoban
Hare tugoteng masuhay
Kundi umibang mag-omaw
Duman sa kamurawayan
AN DEVOTOS MO SUROGON SA MGA SAKIT AGAWON
Ilawi kan simong pag-ampon
Asin pagkamaheherakon
Magdalitang padanayon
Ta iyo ming linalaom
An bagsik nin Dyos na Poon
Na sa gabos paraampon
AN DEVOTOS MO SUROGON SA MGA SAKIT AGAWON
No comments:
Post a Comment