AN PASUNOD-SUNOD KAN MISA

RITO SA PAGPOON:

PADI: Sa ngáran kan X Amâ, asín kan Ákì, 
        asín kan Espíritu Sánto.

Banwaan: Amen.

PADI: An gracia ni Jesu Cristong                  
                        Kagurangnan ta, an pagkamoot 
        kan Dios, asin an pakisumaro 
        kan Espiritu Santo mapasaindo gabos.

Banwaan: Asin sa saimong espiritu.
___________________________
o an masunod na formulario

PADI: An Kagurangnan mapa-saindo.

Banwaan: Asin sa saimong espiritu.

___________________________

GAWE NIN PAGSOLSOL:

PADI: Mga túgang, 
        akóon ta an satóng mga kasâlan, 
        tangáning magkánigò 
        kitáng magcelebrár 
        kan mga banál na mistéryo.

Gabos: Nagkúkumpisál ako sa Dios na makákamhan, 
        asín saindó, mga túgang, 
        ta nagkasálà ako nin makúrì 
        sa ísip, sa tatarámon, sa gíbo, 
        asín sa kapábayaán:

        asin tinotombok an daghan, sinda nagsasabi: 

        sálà ko, sálà ko, makúring sálà ko.
      

                        Dangan sinda minapadagos:
 
        Kayâ nangángadyì ako ki Santa Maria, 
        dánay na Vírgen, 
        sa gabós na Ángeles asin Sántos, 
        asín saindó, mga túgang, 
        na ako ipamîbì sa Kagurangnán tang Dios.

PADI: Mahérak man lugód satô 
        an Dios na makákamhán asin, 
        pakapatawáda an satóng mga kasâlan, 
        darahón kita sa búhay 
        na daíng kasagkóran.

Banwaan: Amen.

KYRIE:

PADI: Kagurangnán, mahérak ka.

Banwaan: Kagurangnan, maherak ka.

PADI: Crísto, mahérak ka.

Banwaan: Cristo, maherak ka.

PADI: Kagurangnán, mahérak ka.

Banwaan: Kagurangnan, maherak ka.

GLORIA:

Kamurawáyan sa Dios sa kaitaásan 

asin sa dagâ katoninóngan 

sa mga táwong maraháy an boót. 

Inoómaw mi iká, rinórokyáw mi iká, 

sinásambá mi iká, pinápamuráway mi iká. 

Pinápasalamátan mi iká 

huli kan dakúlà mong kamurawáyan, 

Kagurangnán na Dios, Hádeng langitnón, 

Dios Amáng makákamhán. 

Kagurangnán Áking Bogtóng, Jesu-Crísto, 

Kagurangnán na Dios, Cordéro kan Dios, 

Áki kan Amâ, 

iká na nagpapárà kan mga kasâlan kan kinâban,kaheráki kamí; 

iká na nagpapárà kan mga kasâlan kan kinâban, akóa an samóng pakimahérak. 

Iká na nagtutúkaw sa toó kan Amâ, 

kaheráki kami. 

Ta iká saná an Banál, iká saná an Kagurangnán, 

iká saná an Oróg Kahalangkáw, 

Jesu-Crísto, kaibá kan Espíritu Sánto: 

sa kamurawáyan kan Dios Amâ. Amén.

PAMIBI SA PAGPOON (COLECTA)

PADI: Mamibi Kita...

    

(Babasahon kan padi an angnay na pamibi)

Banwaan: Amen.

Liturgia Kan Tataramon

ENOT NA BABASAHON

Lector:            Tataramon kan Kagurangnan

Banwaan:        Salamat sa Dios.

SALMO RESPONSORIAL

An salmisya, o cantor, nagkakanta o nagpapangadie kan salmo, mantang an banwaan an nagsisimbag.

IKADUWANG BABASAHON

Kun igwa nin ikaduwang babasahon, binabasa ini kan lector sa ambo siring sa sinambit sa Enot na babasahon.

PAGROKYAW KAN BANAL NA EVANGELIO:

PADI:            An Kagurangnán mápa-saindó.

Banwaan:     Asin sa saimong espiritu.

PADI:            Pagbasa kan banal na Evangelio sosog ki N.,

Banwaan:      Kamurawayan saimo, Kagurangnan.

Sa pagtapos

PADI:             Marhay na Bareta kan Kagurangnan

Banwaan:       Pag-omaw saimo, Cristo.

HOMILIA

CREDO: 

Credo Niceno-Constantinopolitano

Nagtútubód ako sa saróng Dios, 

Amáng makákamhán, 

kaggíbo kan lángit asin kan dagâ, 

kan gabós na nahíhilíng asin daí nahíhilíng. 

Asín sa saróng Kagurangnán na si Jesu-Cristo, 

Bogtóng na Ákì kan Dios, 

asin námundág gíkan sa Amâ

bágo kan gabós na panahón. 

Dios na gíkan sa Dios, ílaw na gíkan sa ílaw, 

totóong Dios na gíkan sa totóong Dios, 

ípinangákì, daí linaláng, 

sarô sa pagká-Dios sa Amâ: 

húli saiya nágkaigwá kan gabós.

Húli sa satóng mga táwo 

asín húli sa satóng kaligtásan 

naghílig siya hálè sa kalangítan.

Sa mga minasunod na tataramon, sagkod sa “asin nanitawo,” 

an gabos minaduko.

Asin náni-lamán húli kan Espíritu Sánto 

ki Virgen Maria, asin náni-táwo.

Ipinákò pa sa cruz pára satò 

kan panahón ni Póncio Piláto; 

nagtíos sagkód sa kagadánan asin ilinobóng, 

asin kan ikatolóng aldáw nabúhay-liwát, 

sósog sa mga Kasuratán, asin suminakát sa lángit, 

nágtutúkaw sa toó kan Amâ.

Asín mamuráway na mábalik, 

sa paghukóm sa mga búhay asin mga gadán, 

an saiyang kahadéan daíng katapúsan.

Asin sa Espiritu Santo, 

Kagurangnán asin kagtaó nin búhay: 

na gíkan sa Amâ asin sa Ákì.

Siya, kaibá kan Amâ asin kan Ákì, 

sabáy na sinásambá asin pinápa-muráway: 

siya nagtarám sa paági nin mga profétas.

Asin sa sarô, banál, católico 

asin apostólicong Simbahan.

Nagpápaháyag ako nin pagtubód sa saróng bonyág 

sa pagpatáwad nin mga kasâlan.

Asin nagháhalat ako 

kan págkabúhay-liwát nin mga gadán, 

asin kan búhay sa máabot na panahón. Amén.

o kaya;

CREDO APOSTOLICO

Nagtutubod ako sa Dios Amang makakamhan,

kaglalang kan langit asin daga,

asin ki Jesu Cristo, Aking bogtong niya, 

Kagurangnan ta, ipinangidam huli kan Espiritu Santo,

namundag ki Virgen Maria, 

pinasakitan kan panahon ni Pontio Pilato, 

ipinako sa cruz, nagadan asin ilinubong, 

huminilig sa mga gadan, 

kan ikatolong aldaw nabuhay-liwat hale sa mga gadan,

suminakat sa kalangitan, 

nagtutukaw sa too kan Dios Amang makakamhan, 

hale duman mabalik sa paghukom sa mga buhay asin mga gadan. Nagtutubod ako sa Espiritu Santo, 

sa banal na Simbahan na catolico, 

sa paro-pakinabang nin mga santos, 

sa pagpatawad nin mga kasalan,

sa pagkabuhay-liwat nin laman, 

sa buhay na daing kasagkoran. Amen.

PAMIBI NIN BANWAAN

Liturhiya kan Eucaristia

PAGDOLOT:

PADI: Inoómaw ka, Kagurangnán, 

                        Diós nin gabós na linaláng, 

              húli ta sa saímong pagká-matináo 

                        nag-ákò kamí nin tinápay, 

                        na idinodólot mi saímo, 

                        búnga kan dagâ asín kan gíbo 

                        kan mga kamót nin mga táwo: 

                        iní magígin pára samô 

                        tinápay nin búhay.

Banwaan: Pag-omawon an Dios sagkod pa man.

PADI: Inoómaw ka, Kagurangnán, 

                        Diós nin gabós na linaláng, 

                        húli kan saímong pagká-matináo 

                        nag-áko kamí nin árak, 

                        na idinodólot mi saímo, 

                        búnga kan balágon asín kan gíbo 

                        kan mga kamót nin mga táwo, 

                        iní magígin pára samô 

                        inómon nin kalág.

Banwaan: Pag-omawon an Dios sagkod pa man.

PADI: Magpamîbì kamó, mga túgang: 

                        tangáning an sakô 

                        asin an saindóng átang 

                        maákò man lugód 

                        kan Dios Amáng makákamhán.

Banwaan: Akoon man lugod kan Kagurangnan 

                        an atang sa saimong mga kamot 

                        para sa kaomawan asin kamurawayan kan saiyangngaran, 

                        para man sa pakinabang niato asin kan bilog niyang banal na Simbahan.

PAMIBI SA MGA DOLOT

Pinapamibi kan padi an angay na pamibi para sa mga atang.

Banwaan: Amen

PREFACIO:

PADI: An Kagurangnán mápa-saindó. 

Banwaan: Asin sa saimong espiritu.

PADI: Iitáas an mga púsò.

Banwaan: Initaas mi na sa Kagurangnan.

PADI: Magpasalámat kitá sa Kagurangnán 

satúyang Dios. 

Banwaan: Maninigo asin dapat.

PADI: Totoong maninigo asin dapat...

Banwaan: Banál, banál an Kagurangnan 

                        Dios nin mga Hukbô. 

                        An langit asin daga 

                        pano kan Saimong kamurawayan. 

                        Hosánna sa kaitaasan. 

                        Paladan an minadigdi 

                        sa ngaran kan Kagurangnan. 

                        Hosánna sa kaitaasan.

Pamibi sa Eucaristia II

Kagurangnán, iká nanggád an Banál, 

burábod nin gabós na kabanálan.

Benebendito an mga kamot, dangan laob an mga ini sa ibabaw kan mga atang, siya nagsasabi:

Kayâ iníng mga átang, namímîbì kamí,

pabanalá kan ambón kan saimong Espíritu,

benebendito an mga kamot asin durongan na benebendicionan an hostia asin caliz na nagsasabi:

tangáning pára samô 

magín Háwak asín XDugô 

kan samóng Kagurangnán na si Jesu-Crísto.

Benebendito an mga kamot.

Sa mga minasunod na formula, an mga tataramon nin Kagurangnan sinasabing malinaw asin sayod, sosog sa hinahagad kan siring na mga tataramon.

Kan siyá, nagtugot na 

pinasaluiban sagkod sa Pasión,

kinukua an tinapay, asin iniitaas nin kadikit sa ibabaw kan altar, asin nagpapadagos:

nagkuá siya nin tinápay, asin pagpasalámat, 

bináak iní,asín itinaó sa saíyang mga disípulos, 

        na an sábi:

minaduko nin kadikit

MAG-ÁKÒ KAMÓ GABÓS 

ASÍN MAGKAKÁN KAINÍ:

TA INÍ AN SAKÚYANG HÁWAK,

NA IDODÓLOT PÁRA SAINDÓ.

An sagradong hostia ibinabayaw sa banwaan, ibinabalik sa patena, asin an padi, nakaiuhod an sarong tuhod, nagsasamba... Pakatapos an padi nagpapadagos: 

Síring man, pakápamanggí,

kinukua an caliz, iniitaas nin kadikit sa ibabaw kan altar, nagpapadagos:

 

pagkuá niyá man nin cáliz, 

asín giráray pagpasalámat saímo,

itinaó sa saíyang mga disípulos, 

na an sábi:

minaduko nin kadikit

MAG-ÁKÒ KAMÓ GABÓS 

ASÍN MAG-INÓM KAINÍ:

        TA INÍ AN CÁLIZ KAN SAKÚYANG DUGÔKAN BÂGO

        ASIN DÁNAY NA TÍPAN, 

        NA PÁPABOLÓSON PÁRA SAINDÓ

        ASÍN PÁRA SA DAKÚL

        SA PAGPATÁWAD KAN MGA KASÂLAN. 

        INÍ PAGGIBÓHON NINDÓ SA PAGROMDÓM SAKÔ.

PADI: Mistério kan pagtubód.

Gabos: An págkagadán mo, Kagurangnán, 

                ipínapamaréta niámò, 

an pagkabuhay mo liwat ipinapahayag, 

sagkod na ika magdatong.

_________________________________________________

o an masunod na formulario

                Sa lambang pagkakan mi kaining tinapay, 
                asin pag-inom kan Caliz, an pagkagadan mo Kagurangnan,

                ipinapamareta niamo sagkod na ika magdatong.

_________________________________________________

o an masunod na formulario

                Paraligtas kan kinaban, ligtasan kami;

                Huli kan Kruz asin pagkabuhay mo liwat

                Itinatalingkas mo kami

_________________________________________________

Dangan nakabuka an mga takyag, an padi nagsasabi:

Kayâ kami na nagróromdóm 

kan saíyang pagkagadán 

asín pagkabúhay-liwát, 

nagdodólot saímo, Kagurangnán, 

kan tinápay nin búhay 

asín cáliz nin kaligtásan, 

nagpápasalámat ta pinápagkánigò mo 

na mag-atúbang asín maglingkód saímo.

Asín nakíkimahérak kamíng nag-áarang, 

na kamíng nagpápa-kinábang 

kan Háwak asin Dugô ni Crísto 

págsararoón kan Espíritu Sánto.

Concelebrante 1:

Giromdomá, Kagurangnán, 

an saímong Simbáhan 

na nakalakóp sa bílog na kinâban, 

tangáning malubós mo siyá sa pagkámoot 

kaibá kan samóng Pápa si Francisco

asín kan samóng Obíspo, si N. 

        asín kan gabós na cléro.

Concelebrante 2:

        Síring mán giromdomá sa saímong pagkahérak, 

        an samóng mga túgang na nagtúrog sa pagláom kan pagkabúhay- liwát, 

        asín an gabós na mga gadán, 

dángan akóa sindá sa liwánag 

kan saímong lalawgón. 

Kaheráki kamí gabós, namímìbì kamí, 

tangáning kaibá ni Sánta María, 

Vírgen na Inâ kan Diós,

Kaiba ni San Jose, an saiyang agom 

kan mga banál na Apóstoles 

asín gabós na Sántos 

na kaidtó pa nakápagayá-gáya saímo, 

magkánigong mágin kahirás 

kan búhay na daíng kasagkóran, 

mag-ómaw asín magpamuráway saímo 

síring man

benebendito an mga kamot 

húli sa Áki mong, si Jesu Crísto.

PADI: Húli saíya, asín kaibá niyá, asín sa saíya, 

saímo Dios Amáng makákamhán sa

                pagkásarô kan Espíritu Sánto, an gabós na

                kagalángan asín kamurawáyan, sa gabós na

                kapanahónan kan mga panahón.

Banwaan: Amen.

Rito sa Pagcomunion

AMA NIAMO

PADI: Natukdoán 

                kan mga nakákaligtás na túgon, 

asin pinatoód 

                kan diosnón na kaugalián, 

nangangáhas kitáng magsábi:

Gabos: Amâ niámò, na yáon sa lángit:

                pabanalón an ngáran mo;

                magdatóng an kahadéan mo;

                mangyári an boót mo sa dagâ 

                nin síring sa lángit.

                An samóng kakánon sa aróaldáw 

                itaó mo samúyà ngonián,

                asín patawádon mo kamí 

                sa samóng mga kasâlan,

                síring na pinápatáwad niámò 

                an mga nagkákasálà samúyà;

                asín haré kamí pagdarahá sa sugót;

                kundî agáwa kamí sa maráot.

PADI: Agáwa kamí sa gabós na maráot, 

                namímîbì kamí Kagurangnán; 

                warásan sa mga aldáw niámò 

                an katoninóngan, 

                tangáning kamíng natabángan 

                kan saímong pagkahérak 

                magín dánay na talingkás sa kasâlan 

                asín man ligtás sa gabós na kapurisáwan: 

                mantáng kamí nagháhalat

                kan maogmáng pagláom asín 

                pagdatóng kan samóng Paraligtás na si Jesu Crísto.

Banwaan: Huli ta saimo an kahadean, asin an kapangyarihan, 

                        siring man an kamurawayan sa mga kapanahonan.

PADI: Jesu Crístong Kagurangnán, 

                iká na nagsábi sa saimong mga Apóstoles: 

                Katoninóngan iwinawálat ko saindó, 

                an sakóng katoninóngan itinátao ko saindó: 

                haré paghilingá an samóng mga kasâlan, 

                kundî an pagtubód 

                kan saímong Simbáhan; 

                asín papag-kánigoá na siyá mapa-tonínong 

                asín magká-boronyóg 

                sósog sa saímong kabôtan. 

                Iká na nabubúhay asín naghahádè 

                sa kapanahónan kan mga panahón.

Banwaan: Amen.

PADI: An katoninóngan kan Kagurangnán 

                dánay na mápa-saindó.

Banwaan: Asin sa saimong espiritu.

PADI:         Magpá-tinaraóhan kamó 

(Diakono) nin katoninóngan.

Sosog sa kinaugalian, an gabos nagpapahayag kan katominongan, pagkasararo asin pagkamoot sa lambang saro.

Gabos: Cordero kan Dios, 

                na nagpapara kan mga kasâlan kan kinaban: kaheraki kami.

Cordero kan Dios,

                na nagpapara kan mga kasâlan kan kinaban: kaheraki kami.

Cordero kan Dios,

                na nagpapara kan mga kasâlan kan kinaban: tawi kami nin 

                katoninongan.

PADI: Úya an Cordéro kan Diós, 

                        úya an nagpapárà 

                        kan mga kasâlan kan kinâban. 

                        Paládan an mga inapód 

                        sa pamanggí kan Cordéro.

Banwaan: Kagurangnán, bako akong maninigo 

                        na ika magdagos sa sakuyang harong: 

                        alagad magtaram ka sana, asin an sakong 

                        kalag maoomayan.

PAMIBI PAKACOMUNION:

PADI: Mamîbì kitá…

Pinapamibi kan padi an angay na pamibi paka comunion

Banwaan: Amen.

SOLEMNENG PAGBENDICION:

PADI: Bendicionán man lugód kamó 

                        kan Dios na makákamhán: 

                        Xan Amâ, asín Xan Ákì, 

                        asín X an Espíritu Sánto.

Banwaan: Amen

PADI: Lakáw kamó 

(Diakono) sa katoninongan ni Cristo.

Banwaan: Salamat sa Dios!