Enot na Babasahon (Isaias 2:1-5)
Pagbasa sa Libro ni Profeta Isaias
Iyo ini an nahiling ni Isaias, aki ni Amos, mapadapit sa Juda asin sa Jerusalem. Sa mga maabot na aldaw, an bulod kan templo nin Kagurangnan maitaas asin mahalangkaw pa sa bulod asin bukid. An gabos na banwaan madolok saiya, dai mabilang na mga tawo mapasiring saiya asin masabi: "Madya, matukad kita sa bulod nin Kagurangnan, sa templo kan Dios ni Jacob: itutukdo niya sato an saiyang mga dalan, tanganing makalakaw kita sa saiyang aagihan." Huli ta an tugon magikan sa Sion, asin an tataramon nin Kagurangnan magikan sa Jerusalem. Maghahade siya sa mga banwaan, huhukoman niya an katawohan: an saiyang mga minasbad gigibohon na mga arado; an saiyang mga garod gigibohon na mga asyab: daing banwaan na mabingat nin minasbad sa kapwa banwaan: Dai na mag-aandam para sa labanan. Madya, O harong ni Jacob: maglakaw kita sa liwanag nin Kagurangnan.
Tataramon kan Kagurangnan.
Salmo-Responsorio (Salmo 122:1-2.3-4.4-5)
S. Naogma ako kan ako sinabihan maduman kita sa harong nin Kagurangnan.
Ako naoogma kan ako saindang sinabihan
"maduman kita sa harong nin Kagurangnan."
Ngonian an samong mga bitis uya na
sa mga pintoan mo, O Jerusalem.
S. Naogma ako kan ako sinabihan maduman kita sa harong nin Kagurangnan.
Jerusalem pinatugdok na banwa:
masarig, makusog, burunyog.
Duman minaturukad an mga tribo
mga tribo nin Kagurangnan.
S. Naogma ako kan ako sinabihan maduman kita sa harong nin Kagurangnan
Katoninongan nin Israel ipamibi nindo
Katoninongan sa saimong mga harong!
Katoninongan sa laog nin saimong mga paril!
Sa saimong mga palacio, katiwasayan.
S. Naogma ako kan ako sinabihan maduman kita sa harong nin Kagurangnan.
Huli sa pagkamoot sa mga tugang ko
asin mga katood, sinasabi ko,
"An katoninongan mapasaimo!"
Huli sa pagkamoot sa harong nin Kagurangnan,
ipapamibi ko an saimong karahayan,
S. Naogma ako kan ako sinabihan maduman kita sa harong nin Kagurangnan.
Ikaduwang Babasahon (Roma 13:11-14)
Pagbasa sa Surat ni San Pablo sa mga taga-Roma
Aram nindo na an oras uya na kaya, mata na kamo: an kaligtasan orog na harani ki sa kaidto sa kapinonan nin satong pagtubod. Lihis na an banggi, uya na an aldaw, kaya isikwal an mga gibo sa diklom, asin gamiton an kalasag nin liwanag. Maglakaw siring sa maninigo, arog baga kan aldaw. bakong sa karakanan asin irinoman, bakong sa kapasloan asin karigsokan, bakong sa pag-iriwal asin sa pag-inuri-urihan: kundi arogon nindo si Jesucristong Kagurangnan; lingawan an pagtaong gusto sa mga minamawot kan laman.
Tataramon kan Kagurangnan.
Pagrokyaw (Salmo 85:8)
S. Alleluia! Alleluia!
Kagurangnan, ipahiling mo samuya an saimong pagkaherak,
asin itao mo samo an saimong kaligtasan.
S. Alleluia! Alleluia!
Evangelio (Mateo 24:37-44)
+ Pagbasa kan Evangelio na Sinurat ni San Mateo
Si Jesus nagsabi sa saiyang mga disipulos: "Pagdatong kan Aki nin Tawo, mangyayari siring kan panahon ni Noe: bago magbaha, an mga tawo nagkakan, nag-inom, nagpakasal sagkod sa aldaw na si Noe luminaog sa sakayan. Uminabot an baha asin inapod sinda gabos. Arog kaiyan an mangyayari sa pagdatong kan Aki nin Tawo: duwang lalaki nasa oma: an saro dadarahon asin an saro iwawalat; duwang babae sa gilingan; an saro dadarahon asin an saro iwawalat. Kaya, magbantay; huli ta dai nindo aram kun sa anong aldaw madatong an saindong Kagurangnan. Aram nindo na kun an kagsadiri kan harong makaisi kun sa anong oras madatong an parahabon, magbabantay asin dai matugot na sakaton an harong. Kaya, danay na mag-andam, huli ta sa oras na dai linalaoman, madatong an Aki nin Tawo."
Marahay na Bareta kan satong Kagurangnan.
